Link açıqlığı

Ukraina prezidentiniñ qırımtatar halqınıñ işlerinden vekâletlisi, Yuqarı Şura deputatı Mustafa Cemilev ukrain eyyeti erkânında Tel-Avivge yol aldı (İsrail), mında o memurlar, dissident areketleriniñ temsilcileri ile körüşti ve Qırımnıñ Rusiye tarafından işğal etilgeni aqqında tarif etti.

Bu aqta vekâletliniñ Facebooktaki resmiy saifesinde aytıla.

Olğan malümatqa köre, Cemilev İsrail Knessetiniñ spikeri Yuliy Edelşteyn ile körüşti. Muzakerelerniñ esas qısmı İsrailniñ Ukrainanıñ Rusiye istilâsına qarşı küreşine yardımı mevzusına bağışlanğan edi.

«Ukrain eyyeti ile Mustafa Cemilev İyerusalimde ukrain medeniyeti festivalini ziyaret etti. Buhrannıñ başlanuvı ile İsrailge köçip kelgen Ukraina vatandaşlarınıñ sayısı ğayet arttı, amma Ukraina ile alâqaları üzülmey», – dep bildire Cemilevniñ matbuat hızmeti.

Mında şunı da qayd ettiler ki, İyerusalimde Cemilev «Sohnut» halqara sionist teşkilâtınıñ başı, belli dissident Natan Şçaransknen körüşti, uquq qoruyıcı areket iştirakçileriniñ mezarlarına bardı.

Matbuat hızmetiniñ malümatına köre, qırımtatarlarnıñ yetekçisi Vifleyemge de barğan ve Palestin muhtariyetinde Türkiye Cumhuriyetiniñ konsulı Mustafa Sarniç ile körüşken eken. Cemilev onı işğal etilgen Qırımnıñ meseleleri ile tafsilâtlıca tanış etti.

XS
SM
MD
LG