Qırımtatar devlet akademik muzıkalı-drama teatri «Teatr. Çehov. Yalta» teatr sanaatı halqara festivalinde Gran Prix qazandı.
Qırımnıñ rusiyeli Medeniyet nazirliginiñ matbuat hızmeti bildirgeni kibi, Rinat Bektaşevnıñ «Arşin Mal Alan» oyunı «Eñ yahşı muzıkalı oyun» namzetliginde ğalebe qazandı.
Teatr aktörı Eldar Celilov «Ekinci plan rolü ve artist cazibesi içün» diplomı ile taqdirlendi.
Festivalde Qırım, Ermenistan, İran, Nepal, Türkiye ve Rusiye icadiy taqımları iştirak etti.
Böylece, «Rusiye klassikasınıñ teren teatr menimsevi içün» mukâfat «Zapiski sumasşedşego» («Aqıldan ayırılğannıñ tezkereleri») oyunı içün Türkiyeniñ «Atolyetheater»ine berildi.
Katmandu şeerinden kelgen «Lokdrishtatheatre» Nepal teatri «Nasipsiz ana» oyunı ile «Faal vatandaşlıq mevamı ve onıñ sanada kösterilmesi içün» namzetliginde birincilikni elde etti.
Bunıñ ile, Qırımnıñ rusiyeli ükümetinde yarımadağa ecnebiy taqımlarnıñ kirişi aqqında bir şey bildirmeyler. Qırım.Aqiqat buña Ukraina medeniyet nazirliginiñ cevabını bekley.
