«Discursus» edebiy agentligi, «Strana» mecmuası ve «E» kitap tükânı «Qırım ukraince» kitabınıñ Kiyevde sentâbr 15 künü keçirilecek taqdimine davet eteler.
Teşkilâtçılarnıñ sözlerine köre, kitap – «Novella ukraince» yarışında toplanğan novellalarnıñ cıyıntığıdır.
«Ukraina ve diger memleketlerde yaşağan müelliflerniñ yarımada aqqında şahsiy ikâyeni yazmağa imkânı bar edi. Yekâne talap – adiselerniñ yüz bergen yeri – Qırımdır. Yarışnıñ eñ yahşı novellalarını «Qırım ukraince» kitabına topladılar», – qayd eteler agentlikte.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
