Link açıqlığı

Saatnıñ esas haberi

Meclis Qırımnıñ qaytarılması içün Rusiyege qarşı cezalarnı arttırmağa çağıra


Qırımtatar Milliy Meclisiniñ reisi Refat Çubarov Ğarpnı Rusiyege qarşı cezalarnı arttırmağa ve Ukrainağa silâ bermege çağıra. Bütün bunda o işğal etilgen Qırımnıñ qaytarıluv imkâniyetini köre, haber ete Qırım.Aqiqat.

«Daa da semereli obyektlerni saylamaq kerek (sanktsiyalar içün – QA). Menimce, Putinniñ yaqın maliyeviy etrafı. Olarnı Putin iş odasına kirip – olmaz, Qırımdan ketmelimiz demege mecbur etiñiz», – dedi Çubarov sentâbr 12 künü Kiyevde keçirilgen «Yalta Avropa strategiyası» forumında.

Meclis yetekçisi aytqanı kibi, Qırımnıñ işğalden azat etilmesiniñ daa bir müim noqtası – Ukraina mudafaa imkâniyetiniñ arttırıluvıdır..

Qayd etkenine köre, Qırımnıñ qaytarıluvını uzatmağa mümkün degil, çünki yarımadada Rusiyeniñ işğaline qarşı çıqqan halq – qırımtatarlar yaşay.

Qırım Rusiye tarafından 2014 senesi işğal etilgeninden evel YES körüşüvleri Yaltanıñ Livadiya sarayında keçirile edi.

Keçken seneden YES Kiyevde keçe. Bu sene tedbir «Telüke zonasında: Yañı Ukraina taqdiriniñ Avropa ve dünyağa tesiri» şiarı ile keçti.

XS
SM
MD
LG