Ukraina Tış işler nazirligi vaqıtnca işğal etilgen Qırım Muhtar Cumhuriyeti ve Aqyar şeeriniñ Rusiye prezidenti Vladimir Putin ve İtaliyanıñ sabıq baş naziri Silvio Berlusconi tarafından etilgen ziyaretini takbih etti.
Kiyevde deyler ki, bu ziyaret ukrain tarafınıñ izni olmadan ve Ukrainanıñ işğal etilgen toprağına kiriş-çıqış qaideleriniñ bouzuluvı ile keçirile.
«İşğal etilgen Qırımğa işbu ziyaret Rusiyeniñ qanunsız işğalni qanunlaşıtrmaq ve Ukraina devlet mustaqilligini aşalamaq ıntıluvıdır. İtaliya siyasetçisiniñ areketleri de Avropa birliginiñ siyasetine qarşıdır», – denile nazirlikniñ beyanatında.
Tış işler nazirligi kene bir kere ecnebiy vatandaşlarnı Ukraina topraq bütünligini ve mustaqilligini ürmet emtege çağırdı.
Berlusconi Putinge «şahsiy ziyaret» ile kelgendir. Bundan evel eki kün musafir Rusiyeniñ Soçi kurortında bulundı. Sentâbr 9 künü Kreml spikeri Dmitriy Peskov aytqanı kibi, bu eki erkeniñ «eski iş ve şahsiy munasebeti» bar. Berlusconi İtaliyağa sentâbr 13 künü qaytmalı.
