Qırımtatarlarnıñ yetekçileri tarafından ilân etilgen Qırımnıñ erzaq qamaçavı işğal etilgen yarımadağa para aqımını nezaret etmek maqsadı ile planlaştırıla. Bunıñ ile Ukraina vatandaşlarınıñ aqlarına riayet etmek kerek.
Bunı Qırım.Aqiqatqa Ukraina Yuqarı Şurasınıñ deputatı, Yuqarı Radanıñ insan aqları, milliy azlıqlar ve miletlerara munasebetler boyunca komitetiniñ reisi muavini Georgiy Logvinskiy bildirdi.
«Biz uquq qoruyıcılar ile birlikte çeşit kоntseptsiyalarnı tüşündik – qamaçavnı doğru keçirmek içün. Qamaçav – aqçamızğa Keriç köprü kibi obyektler qurulmasın, paramız işğalcilerniñ ordusına ketmesin dep teşkil etilgen nezaret şeklidir. Zaruriy aqlarnıñ temin etilmesine qarşı degilmiz, amma bu meseleni bir tertipke ketirmelimiz», – dey Logvinskiy.
Bunıñ ile o yarımadada yaşağan vatandaşlarnıñ aqları aqqında unutmağa mümkün olmağanını qayd etti.
«Vazifemiz – doğru kontrolni teşkil etmek. Bir taraftan, vatandaşlarımızğa yardım etmelimiz, başqa taraftan – bir kapigimiz bile Aksenov ve diger separtistlerniñ cebine ketmemeli. Şunıñ içün qarar almalımız – cenkleşemiz yoqsa alış-veriş yapamız», – dep qoştı halq deputatı.
Hatırlatamız, qırımtatarlarnıñ yetekçileri Qırım ile memuriy sıñırnı blok etip, işğalci yarımadağa ukrain malınıñ ketirilmesini toqtatmaq niyetindeler.
