Yaltada ev divarları üstünde peyda olmağa başlağan Vladimir Putinniñ büyük resimleri belgisiz şahıslar tarafından «tüzetile». Şeer kommunal hızmetleri bozulğan portretlerni acele sürette boyalaylar, haber ete Qırım.Aqiqat mühbiri.
Cuma künü, sentâbr 11-de, Yalta kirişindeki köpür astında olğan Putinniñ portretinde: «Qırım bizim degil, menim» yazısı peyda oldı. Bunıñ ile Putinge Adolf Gitlerniñ mıyıqlarına oşağan mıyıqlarnı ve burnunda svastikanı qoştılar.
Rusiye prezidentiniñ Yaltada Kiyevskaya ve Krivoşita soqaqlarnıñ çarpazında olğan portreti de tüzetildi.
Avtovokzal yanındaki köpür altında boyalanğan graffitide «Rusiye ….. kete» kibi yazı yazılğan, küfür sözni daa boyalamağa yetiştirmediler.
Yalta şeer yolbaşçılığı bütün bunı vaqtında qayd etti, saat 10-dan kommunal şirketniñ hadimleri Putin portretlerini külrenki boya ile boyalaylar.
