Link açıqlığı

Rusiye Qırımnı işğal etkenine ve Donbasstaki kerginlikke qol tutqanına qadar oña qarşı sanktsiyalar saqlanılacaq. Bunı o cuma künü, sentâbr 11-de, er yıllıq «Yalta Avropa Strategiyası» (YES) körüşüvinde çıqışta bulunıp ayttı, haber ete Qırım.Aqiqat.

Onıñ sözlerine köre, Rusiye Federatsiyası Ukrainağa nisbeten öz areketlerine devam etse, oña qarşı yañı sanktsiyalar kirsetilmeli.

«Rusiye Qırımnı işğal etkenine ve Donbasstaki kerginlikke qol tutqanına qadar tek bugünki cezalar degil de, Rusiye vaziyetniñ bir tertipke ketirilmesine keder etse, daa da sıñırlayıcı sanktsiyalarnıñ kirsetilecegini bildirmek kerekmiz. Rusiyeni Minsk añlaşmalarınıñ mantığına riayet etmege mecbur etmelimiz», – dedi o.

Bunıñ ile Ukraina prezidenti Rusiyeniñ Ukrainağa qarşı istilâsı «Avropalılar içün birdemlik sınavı» olğanını qayd etti.

«Rusiyeniñ Ukrainağa qarşı istilâsı Avropalılar içün sınavdır. Birdemlik, birlik, demokratiya degerliklerine sadıqlıq sınavı. Umumiy degerlikler sınavı. Bu sınavdan keçmek içün, umumiy areket ve tefekkürge muracaat etmelimiz. Rusiyeni küç siyasetinden vazgeçip, aq siyasetine qaytmağa mecbur etmek içün elimizde olğan bütün aletlerimizni azır tutmalımız», – qayd etti Poroşenko.

Qırım.Aqiqat bildirgeni kibi, Poroşenko Ukraina Rusiye tarafından işğal etilgen Qırım üzerinde nezaretini qaytarmağa planlaştırğanını bildirdi.

Bildirilgeni kibi, Kiyevde 12-nci er yıllıq «Yalta Avropa Strategiyası» (YES) körüşüvi keçirile. Sentâbr 11 künü, cuma, tedbirni Ukraina prezidenti Petro Poroşenko aça, çıqışı al-azırda 350 ecnebiy siyasetçi arasında keçe – siyasetçi, diplomat, iqtisatçı, mütehassıslar, ressamlar, cemaat erbapları.

«Telüke zonasında: Yañı Ukraina taqdiriniñ Avropa ve dünyağa tesiri» şiarı ile tedbir cumaertesi kününe qadar keçecek.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG