Link açıqlığı

Çubarov Almaniya Tış işler nazirliginiñ temsilcisine Qırımda qırımtatarlarnıñ öldürüvi aqqında tarif etti


Qırımtatar Milliy Meclisiniñ reisi Refat Çubarov Kiyevde Almaniya Tış işler nazirliginiñ «siyasiy müdiri», Ukraina boyunca «normand formatında» muzakerelerniñ idarecisi Andreas Michaelis ile körüşti.

Bunı Meclisniñ matbuat hızmeti bildire.

«Körüşüv neticesinde Almaniya Tış işler nazirliginiñ siyasiy müdiri Andreas Michaelis Almaniya Federativ Cumhuriyeti er vaqıt qırımtatarlarnıñ aqlarını qorçalaycaq ve halqara seviyede halqnıñ problemlеri aqqında aytacağını bildirdi», – denile beyanatta.

Öz nevbetinde, Refat Çubarov Qırımda insan aqları ve qırımtatarlarnıñ havfsızlığı ile bağlı vaziyet pek kergin olğanını qayd etti.

«Yarımadada soñki bir buçuq yıl içersinde semetdeşlerimizniñ ğayıp oluvı qayd etilgen edi, bazıları cansız aldа tapıldı. Qırımtatar faalleri taqip etile ve basqı duyalar. Bütün bular keçmişte qaldı dep ümüt ete edik, amma soñki eki afta devamında Qırımdan kene acınıqlı haberler kele, semetdeşlerimizniñ ğayıp oluvı ve öldürilüvi ile bağlı», – dedi Çubarov, ve Qırımda 2014 senesi fevral 26 künü keçirilgen mitingde iştirak etüde qabaatlanğan faaller Ahtem Çiygoz, Mustafa Degermenci, Ali Asanov aqqında hatırlattı.

İşğal etilgen Qırımda soñ aftaları qırımtatarlarnıñ öldürüvi ile bağlı adiseler sıq oldı. Rusiye taqiqatçıları öldürüviler turmuş sebebinden yapılğanını ayta.

XS
SM
MD
LG