Aqyar akimeti qırımtatar halqına berilgen vadelerinden birini bile yerine ketirmedi, dey Qırımtatar Milliy Meclisi reisiniñ birinci muavini Nariman Celâl.
«Vali Menâylonıñ bergen er bir vadesini şimdi aytamam, amma bulardan esası – umumtasil mekteplerde qırımtatar tilli oqutuvı ile eki sınıfnıñ açılması edi. Böyle sınıflardan biri Mamaşay köyünde ve daa bir köyde açılmaq kerek edi. Amma bunı da, qırımtatar halqınıñ öz tilinde oqumağa aqqını bile, yerine ketirmediler», – dedi Celâl Qıırm,Aqiqatqa.
O, Aqyarnıñ şimdiki başı Sergey Menâyloanıñ «qırımtatarlar Rusiyedeki yaşayışından memnün» olğanı aqta bildirüvi ile de razı degil.
Celâl dey ki, böylece Aqyar akimiyeti, Qırım akimiyeti kibi, istenilgenini aqiqat olaraq köstermege tırışa.
«Menimce, akimiyet qırımtatar halqında olğan aqiqiy vaziyetten haberdar, şunıñ içün böyle sözler – istenilgenini aqiqat olaraq köstermege ıntıluvdır, bu qadar», – dey Celâl.
Evel Aqyarnıñ rusiyeli ükümetiniñ matbuat hızmeti şeerniñ şimdiki başı Sergey Menâylonıñ intervyüsini aşkâr etti, mında o «qırımtatarlarnıñ çoqusı Qırımnıñ diger ealisi ile razı ve Rusiyege eyi munasebette buluna» dep aytqan edi.
