Qırımtatar Milliy Meclisi reisiniñ birinci muavini Nariman Celâl Aqyarnıñ şimdiki başı Sergey Menâylonıñ Türkiye ve qırımtatar diasporasına Qırımda yaşağan qırımtatarlarğa tesir etkenleri ile bağlı qabaatlarnıñ sebepsiz olğanını qayd ete.
Celâl Qırım.Aqiqatqa bildirgeni kibi, qırımtatar halqınıñ Türkiye diasporası endi öz siyasiy baqışını şekillendirmege başladı.
«Türkiyedeki diaspora eñ büyük olğanına baqmadan, siyasiy ceetten endi şekillenmege başlay. Diasporanıñ siyasiy şekillendirüv ketişatı 2009 senesi mayıs ayında keçirilgen Bütündünya Qırımtatar Kongressinden soñ başlandı, amma tek Qırımda 2014 senesi başında yüz bergen vaqilardan soñ faal ilerilemege başladı. Şunıñ içün Türkiyede yaşağan qırımtatarlar yarımadada yaşağanlarğa tesir etkenini aytmağa – aqılsız bir şeydir», – dedi Celâl ve şunı qoştı ki, Menâylo «boş yerde fitne kördi».
2009 senesine qadar Qırım ve Türkiye qırımtatarları arasında esasen medeniy munasebet qurulğanını qayd etti.
«Biz medeniy, yardımlaşuv seviyesinde bağlı edik. Ebet, Türkiye tarafından yardım bar edi, amma qırımtatar halqı arasındaki siyaset merkez Qırımda olmaq kerekligi üzerinde qurula edi. Şunıñ içün siyasiy basqı ve/ ya da nasıldır bir oyunlar aqqında aytmağa mümkün degil», – yekün çekti Celâl.
Sentâbr 9 künü Aqyar rusiyeli ükümetiniñ matbuat hızmeti «İzvestiya» gazetasında şeer valisi Sergey Menâylonıñ maqalesini bastırdı. Maqalesinde Menâylo Türkiye ve qırımtatar diasporasını din ve medeniyet esasında separatizmge celp etüvlerinde qabaatladı.
