Link açıqlığı

Saatnıñ esas haberi

Aqmescitniñ demir yol vokzalı binasında Donbass balalarına destek kontserti keçti


Aqmescit demir yol vokzalı binasında sentâbr 8 künü, «Qırım sanaat ustaları – Donbass balalarına» hayriye festivali çerçivesinde «Tavriçeskiy blagovest» horu ve Qırım filarmoniyasınıñ Akademik simfonik orkestriniñ kontserti keçti.

Qırım.Aqiqat mühbiri bildirgeni kibi, çalğıcılar Franz Schubertniñ «Messa sol major» ve John Rutterniñ «Rekviyem» eserlerini çaldılar.

Teşkilâtçılarnıñ sözlerine köre, çıqışlardan toplanğan aqça öz başına ilân etilgen Donetsk ve Lugansk halq cumhuriyetleriniñ muhtac balalarına berilecek.

Hornıñ bediiy reberi Vladimir Nikolenko aytqanı kibi, çalğıcılar hayriye kontsertlerniñ keçirilmesini devam etmege isteyler ve nevbetteki tedbir onkologik hastaları olğan balalarğa bağışlanacaq.

Kontsertniñ daa bir maqsadı – cemaatçılıqnıñ diqqatını Qırımda demir yol naqliyatınıñ problemlerine celp etmektir. «Qırım filarmoniyası»nıñ baş müdiri İlya Pandul degeni kibi, kontsert ilk sefer böyle bir yerde keçirile ve «Aqmescitniñ bir vaqıtları insanlarğa tolu demir yol vokzalı şimdi deşet bir yerge çevirildi, mında bazıda cemidanı ile kimsesiz bir yolcunı körmege mümkün».

O, yaqında er şey deñişir ve vokzal kene evel olğanı kibi çalışacağına ümüdini bildirdi.

Nevbetteki kontsertler Kezlev, Yalta ve Keriçte keçirilecek. Aqyarda, Lunaçarskiy adına teatrniñ malümatına köre, biletler satlımağanı sebebinden kontsertni lâğu ettiler.

XS
SM
MD
LG