Link açıqlığı

Saatnıñ esas haberi

Qırımda qırımtatarlarğa qarşı cezalavnıñ yañı dalğası başlandı – Smedlâyev


Qırımda qırımtatarlarğa qarşı cezalavnıñ yañı dalğası başlandı. Bunı Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyev öz Facebook saifesinde bildirdi, haber ete Qırım.Aqiqat.

«Olarnıñ artından turğanlar işbu repressiyalarnı körmey bile. Evel olğanı kibi, kene insanlar ğayıp olmağa başladı, cesetleri tapıla, diger ğayıp olğandar aqqında alâ daa haber yoq. Olarnı tutıp esir etken insanlar formağa kiyngenine baqmadan, resmiy malümat yoqtır», – dey Smedlâyev.

Onıñ sözlerine köre, endi bu repressiyalarnıñ «susqan qafadarları, bazıda doğru iştirakçileri» Qırımnıñ Rusiye akimiyeti ile işbirlikte bulunğan qırımtatarları ola.

«Yaqında İçki qasabasında sakinlerniñ özüni qırımtatarlarğa ait etken ve halqımız içün ölmege ant etken memur ile körüşüvi keçti. Körüşüvde onıñ bu vazifede yapqan faydalı işleri aqqında bilmege istegenler de bar edi. Belki, tuvğan tilniñ saqlanuvında yarıdm etti, belki, qanunsızca apiste bulunğan semetdeşi, çoq babalı qoranta başı Ali Asanovıñ azat etilmesine irişti. İşte, bu sual ve meselelerniñ al etilmesi yerinde başqa yolnı sayladılar. Memur ile körüşüv iştirakçileriniñ evlerine politsiya hadimleri tintüv ile keldiler», – dedi Qırımtatar Milliy Qurultayınıñ Merkeziy saylav komissiyasınıñ reisi.

O şunı da qayd etti ki, tintüv sebebini politsiya hadimleri ğayıp olğan mopedniñ qıdıruvı ile añlattılar, faqat tintüv esasen evlerinde, yataq odalarında ve çamaşır dolaplarında keçirildi.

«Repressiyalarnıñ nevbetteki dalğasıdır, maqsadı – öyle de çoq qonuşmağan qırımtatar halqını sustırmaqtır», – dedi Smedlâyev.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG