Link açıqlığı

Dünyanıñ çeşit memleketlerinde Qırım işğaline qarşı aktsiyalar keçirilecek – Refat Çubarov


Bütündünya qırımtatar kongressiniñ icraiy şurası dünya boyunca Ukrainağa qol tutuv ve Qırım işğaline qarşı aktsiyalarnıñ keçirilmesini azırlay. Bunı Kiyevde sentbâr 8 künü keçirilgеn matbuat konferentsiyasında Qırımtatar Milliy Meclisiniñ reisi Refat Çubarov bildirdi, – haber ete Qırım.Aqiqat.

«Yaqın vaqıtta Bütündünya qırımtatar kongressiniñ icraiy şurası tarafından er aynıñ bir künü belgilenecek. Bu kün dünyanıñ çeşit memleketlerinde yaşağan qırımtatarlar Qırımnıñ işğalden azat etilmesine bağışlanğan narazılıq numayışlarını keçirecekler», – dey Çubarov.

O şunı da qayd etti ki, birinci numayışlar yaqın zamanda keçirilecek. Maqsat – dünya toplulığını istilâcığa qarşı küreşke celp etmek.

«Biz içün tek diaspora ve qırımtatarlarnıñ areket etüvi degil de, olarnıñ yaşağan yerlerinde cemaatnıñ areket etkeni müimdir. Esası – olar akimiyetlerini istilâcığa qarşı ve Ukrainağa qol tutuv mevamlarında qattı olmağa mecbur etmeliler», – dedi Qırımtatar Milliy Meclisiniñ reisi.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG