Link açıqlığı

Qırımtatar halqınıñ lideri Mustafa Cemilev aytqanı kibi, Ukraina Qırımnıñ işğalci rejimini teminlememeli. Bunı o Kiyevde keçirilgen matbuat konferentsiyasında bildirdi, haber ete Qırım.Aqiqat.

Cemilevniñ malümatına köre, Qırımğa aşayt malınıñ 80% qıtaiy Ukrainadan kele, elektrik energiyasınıñ 85% Ukrainadan Qırımğa berile, Qırımda bostan suvınıñ bir 80% – ukrain suvu. Amma «böyle al işğalcilerniñ vaziyetini tek qaviyleştire». İlân etilgen aktsiya qıtaiy Ukrainadan Qırımğa aşayt malınıñ ketirilmesini toqtatmalı.

«Anda vatandaşlarımız yaşay, şunıñ içün olarnı elektrik energiyası, suv ve aşayt mallarından marum qaldırıp olamaymız degen laf – saçmalıq, çünki, halqara qaidelerge köre, işğalci territoriyalarnıñ uquqiy, maliyeviy, içtimaiy vaziyeti içün işğal etken memleket mesüliyetlidir. Toprağı işğal etilgen memleket degil», – dep añlata Cemilev.

O şunı da bildirdi ki, yarımadağa Ukraina tarafından ketirilgen malnıñ 80% parom keçitinden Rusiye territoriyasına kete, «qalğan qısmı işğalcilerniñ arbiy bölüklerine, vatandaşlarımıznı qıynağan samooborona otrâdlarına yollanıla».

Böyleliknen, ukrain mallarınıñ yarımadağa ketirilmesi, Cemilevniñ sözlerine köre, manasızdır. Aynı zamanda, Ukrainağa sadıq qalğan Qırım vatandaşlarınıñ mahsulatnı satın almaq imkâniyetini saqlamaq kerek. Bu maqsat ile qırımtatarlar Herson vilâyetinde bu kibi tükânlarınıñ ağını açmağa teklif eteler.

«Satqın olmağan er namuslı insan Herson vilâyetine kelip, qıtaiy Ukrainada olğan fiyatlar boyunca özüne kerekli şeylerni alsın dep, şaraitlerni meydanğa ketirmek kerek. Satqınlar ve kollaborantlar Krasnodar diyarına barsın, olarnıñ problemleridir», – dep qoştı Qırımtatar Milliy Meclisiniñ reisi Refat Çubarov.

Hatırlatamız, qırımtatarlarnıñ yetekçileri Qırım ile memuriy sıñırnı blok etip, işğalci yarımadağa ukrain malınıñ ketirilmesini toqtatmaq niyetindeler.

XS
SM
MD
LG