Qırımtatarlarnıñ yetekçileri Ukraina vatanperverlerini Qırımnıñ aşayt qamaçavına qoşulmağa çağıralar. Bu aktsiyanıñ keçirilecegi aqqında Kiyevde matbuat konferentsiyası devamında bildirilgen edi, haber ete Qırım.Aqiqat mühbiri.
Qırımtatar Milliy Meclisiniñ reisi Refat Çubarov yarımada işğalinden soñ yüz bergen vaziyetni hatırlattı, Qırımnıñ işğalci akimiyeti bir taraftan yarımadanıñ qırımtatar ve ukrain ealisine basqı ete, Ukraina ise, diger taraftan, «işğalciler» içün aşayt mallarını ketire.
«Böyle vaziyet işğalcilerge küç bere, bu mal arbiy garnizonlarğa da yollanıla», – dey Çubarov. Oña qırımtatarlarnıñ lideri Mustafa Cemilev qol tuttı ve şunı dedi ki, «ukrain malınıñ 80% Keriç boğazından Rusiyege yollanıla, çünki anda fiyatlar daa da paalı. İşğal etilgen territoriyalarda semetdeşlerimizni qıynağan aydutlarnı aşatmağa mümkün degil».
«Aktsiya maqsadı – cemaatçılıqnıñ sıñırda olayatqan çirkinlikke diqqatını celp etmek ve işğalci rejim ile munasebetimizni bir tertipke ketirmek. Öz şartlarımıznı bildiremiz. Amma areketlerimiz yolbaşçılığımıznıñ areketlerine qarşı çıqqanını istemeymiz», – dey Mustafa Cemilev.
Matbuat konferentsiyasınıñ iştiarkçileri aytqanı kibi, Kiyevde Sedovtsev, 22 adresi boyunca aktsiyağa azırlıq ştabı açılacaq.
«Vatanperverlerni, Ukrainanı qayğırğanlarnı, Ukrainada devletçilikniñ olmaq kerekligini tüşüngenlerni, Qırımsız Ukrainanıñ devletçiligi ise olamaz, Ukraina vatanperverleri ile vaziyet muzakere etilecek ştabğa kelmege çağıram», – dedi ATR telekanalınıñ müdiri Lenur İslâmov.
Onıñ sözlerine köre, bu aktsiya vastası ile Ukraina Rusiye Federatsiyasına qarşı halqara sanktsiyalarğa qoşula bile.
Qırım 2014 senesi mart ayında Rusiye tarafından işğal etilgeninden soñ Ukraina ve Ğarp memleketleri istilâcı memleketke qarşı iqtisadiy cezalarnı kirsetti.
