Link açıqlığı

Herson vilâyeti Geniçesk rayonınıñ başı Qırımnıñ aşayt qamaçavı faydalı olacağından emindir


Geniçesk rayon devlet memuriyetiniñ başı Aleksandr Vorobyev işğal etilgen yarımadağa ukrain malınıñ kirsetilmesine yol bermemek içün Qırım ile memuriy sıñırnıñ qamaçavına qol tuttı. Bunı o Qırım.Aqiqatqa bildirdi.

«Qırım Rusiye Federatsiyasınıñ orduları tarafından işğal etilgen, çeşit silâ ile toldurılğan, biz ise olarnı mal ile teminleymiz, onı ise soñra Rusiyege de yollap, Ukraina yaman olğanını aytıp yüreler, faqat, aqiqaten, bizim esabımızğa aşaylar. Şimdi insanlar Qırımğa aşayt malnıñ ketirilmesine qarşı narazılığını bildirmege tırışalar. Menimce, bunda mantıq bar. Men memuriyet başı olaraq olarğa qol tutam»,– dedi Aleksandr Vorobyev.

O şuna da diqqatını ayırdı ki, yani bu narazılıq numayışında tek qırımtatarlar degil, diger milletler de iştirak etmeli.

«Ukraina ailesinde olğan er kes bu aktsiyağa qol tutmaq kerek. Ukraina topraqlarınıñ işğalcisini aşatmağa aqqımız yoq. Ayrı biznes strukturaları bundan para qazansalar, faaliyetini qıtaiy Ukrainağa keçirsinler», – dedi rayon devlet memuriyetiniñ başı.

Fikrine köre, qamaçavnıñ faydası olur.

«Tamçı-tamçı neticesi olur. Dünya bugün Ukrainanı öz başına qaldırmay. Biz mında areketsiz otruğanımıznı ve birevniñ yarımıdını beklegenimizni degil de, toprağımıznıñ azatlığı oğrunda küreşkenimizni körmek kerekler», – qayd etti Aleksandr Vorobyev.

Qırım.Aqiqat bildirgeni kibi, qırımtatarlar işğal etilgen yarımadağa ukrain malınıñ kirsetilmesine yol bermemek maqsadı ile Qırım ile memuriy sıñırnıñ qamaçavını azırlay.

XS
SM
MD
LG