Qırımtatarlarnıñ yetekçileri işğal etilgen territoriyağa ukrain malınıñ kirsetilmesine imkân bermemek içün Qırım ile memuriy sıñırnıñ qamaçavını azırlay.
«Sentâbrniñ 20-nci künleri Qırım ile memuriy sıñırda olacaqmız», – dedi Qırımtatar Milliy Meclisiniñ reisi Refat Çubarov Kiyevde matbuat konferentsiyası devamında.
O, aktsiyanıñ başlanuv tarihı kelecek afta ilân etilecegini bildirdi.
Öz nevbetinde, qırımtatarlarnıñ yetekçisi Mustafa Cemilev matbuat konferentsiyasında aytqanı kibi, «ukrain malınıñ 80% Keriç boğazından Rusiyege yollanıla, çünki anda fiyatlar daa da paalı. İşğal etilgen territoriyalarda semetdeşlerimizni qıynağan aydutlarnı aşatmağa mümkün degil».
Bunıñ ile o şunu dey ki, bu areketler ukrain akimiyetiniñ siyasetine qarşı olmamalı.
Cemilevniñ aytqanı kibi, salı künü prezident Petro Poroşenko ile körüşüv olmalı, mında Qırım ile memuriy sıñırda aktsiya keçirilmesi muzakere etilecek.
