Link açıqlığı

Qırımda Rusiye mahsus hızmetleri «fevral 26» işi iştirakçisi ile dost olğan qırımtatarlarnıñ evlerinde tintüv keçirdiler – uquq qoruyıcı


Qırımda Rusiye mahsus hızmetleri «fevral 26» işi iştirakçisi Ali Asanov ile dostlaşqan qırımtatarlarnıñ evlerinde tintüv keçirdiler. Bunı Qırımtatar halqınıñ aq-uquqlarını qorçalav komitetiniñ azası Eskender Bariyev bildirdi.

«FSB qırımtatarlarnı qorquzmağa devam ete!!! Bugün, saat 9-dan FSB İçki rayonı Ferngeym (Urojaynoye) köyüniñ üç evinde tintüv keçirdi. Olardan ekisinde qırımtatarlar yaşay. FSB hadimleri tintüvni keçirmege aq bergen mahkeme qararını kösterdiler. Oña köre, tintüv sanki moped ve cep telefonınıñ ğayıp oluvı ile bağlı. Tintüvge öz şaatlarını ketirdiler. Bitaraf şaatlarnıñ olmasına razılıq bermediler. Qaba davrandılar. Evlerni darma-dağın ettiler», – yazdı o Facebookta.

Onıñ sözlerine köre, qırımtatar aileleri Asanov Ali ile dostlar, üçünci slav qorantası Asanovlarnıñ qomşuları ola.

«Fevral 26» işiniñ iştirakçisi Ali Asanov aprel 15 künü uquq qoruyıcılar tarafından İçki Rayonı Ferngeym (Urojaynoye) köyündeki evi yanında yaqalanıldı, soñra apiske atıldı.

Taqiqatnıñ malümatına köre, Asanov 2014 senesi fevral 26-da Qırım parlamentiniñ binası ögünde Ukraina bütünliginiñ ve «Rus birliginiñ» tarafdarlarınıñ iştiraki ile keçirilgen miting devamında peyda olğan tertipsizlikniñ iştirakçisi edi. Ali Asanovnıñ tevqifte bulunuv müddeti oktâbr 15 künü bite.

İyünde Asanovnıñ dörtünci balası doğdı.

XS
SM
MD
LG