AQŞ, Ğarbiy Avropa memleketlerinde ve Türkiyede qırımtatar diasporalarınıñ faaliyetini nezaret etecek merkezlerni açacaqlar, haber etti Qırımtatar Milliy Meclisiniñ reisi Refat Çubarov Lvivde qırımlılar ile körüşüvinde.
Qırım.Aqiqat mühbiri aytqanı kibi, Çubarov dey ki, dünya qırımtatarları Qırımnıñ Ukrainağa qaytarılması üzerinde çalışmalı ve öz memleket yolbaşçılarından istilâcı memleketke qarşı cezalarnıñ arttırılmasını talap etmeli.
«Faaliyetni nezaret etmek içün, biz, kerçekten de, Kongress ve Meclisniñ bu kibi merkezleriniñ açılması üzerinde çalışamız, bir qaç memlekette olması planlaştırıla. Bunı Washingtondan etmege başladıq. New-Yorkta da olacaqtır. Ekinci adım – Brüksel ve Warszawa. Em de Ankara, tabiiy ki», – dey Çubarov.
Meclis reisi dey ki, qırımtatar ve ukrain diasporaları birlikte faal köstermek kerektirler.
«Bu işni ukrain diasporası ile köremiz. Poloniya ve Kanadada onı endi birlikte yapmaız», – dey Çubarov.
Avgust başında Türkiye paytahtı Ankarada II Bütündünya qırımtatar kongressi keçirildi. Mında qırımtatarlarnıñ Vatanı – Qırımdaki vaziyetleri muzakere etildi. Toplaşuv devamında Kongress prezidentini sayladılar ve dünya toplulığı, qırımtatarlarğa bir sıra muracaat ve beyanname qabul etildi.
