Aqmescitte Qırım ve Aqyar musulmanlarınıñ diniy idaresinde (QMDİ) qırımtatar tili kursları açıldı. QMDİ matbuat hızmeti bildirgeni kibi, kurslar programması laqırdı alışqanlığınıñ inkişafına ve edebiy qırımtatar tiliniñ sarfınıñ añlaşuvına yönelgendir.
Qırımtatar tilini ögrenmege istegini 70 insan bildirdi. Oquv ketişatından evel olar içün kontrol toplaşuvnı keçirdiler.
«Talebelerniñ çoqusı qırımatatar tilini añlağanlarını bildirdi, amma olarğa qonuşma meydançığı kerektir, fikirlerini serbest añlatmağa ve edebiyatnı qırımtatar tilinde oqumağa isteyler», – denile beyanatta.
Talebeler arasında – balaları ile ana tilinde laf etmege istegen yaş qırımtatar qorantaları da bar.
«Derslerge yazılğanlarnıñ bir 10-15% – ukrain ve ruslardır. Olar öz qırımtatar qomşularını ürmet etip, tillerini ögrenmege isteklerini bildirdiler, olarnı añlamağa ve añlaşmağa isteyler», – deyler QMDİde.
Talebelerni til seviyesi boyunca eki gruppağa böldiler. Dersler aftada eki kere keçirilecek. Programma 4 ay devam etecek, 32 dersniñ olması planlaştırıla.
Leyha maqsadı – qırımtatar tilini rağbetleştirmek ve milleti ve dini farqlı olğan qırımlılarnı ögretmektir.
Evel Herson ve Lvivde bedava qırımtatar tili kursları açıldı.
UNESKO halqara teşkilâtı qırımtatar tilini resmiy şekilde yoq olayatqan tiller sırasına kirsetti.
