Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyev Facebookta bildirgeni kibi, sentâbr 7 künü «mayıs 3» işi boyunca yaqalanğan Tair Smedlâyevniñ daa bir mahkeme toplaşuvı keçecek.
«Saat 14:00 Ermeni Bazar şeer mahkemesinde Rusiye Federatsiyası Cinaiy kodeksiniñ 318 maddesi 1-inci qısmı boyunca keçken, 2014 senesi mayıs 3 künü qırımtatarlarnıñ milliy lideri Mustafa Cemilevni qarşılavı vaqtında uquq qoruyıcı organı hadimine qarşı küç qullanuvda şeklengen Tair Smedlâyevniñ mahkeme toplaşuvı keçirilecek», – yazdı o Facebookta.
O şunı da qayd etti ki, bu iş boyunca beş insan yaqalanğan edi.
Evel Qırımda Ermeni Bazarnıñ şeer mahkemesi Aqmescit rayonınıñ 45 yaşında sakini Edem Ebulisovnı qabaatlı tanıdı ve oña 40 biñ ruble miqdarında para cezasını berdi.
