Ukraina Yuqarı Şurasınıñ sabıq deputatı, Qırım siyasetçisi Andrey Sençenko dey ki, Rusiye tarafından Qırım işğal etilgeninden soñ yarımadanı regionda ne olıp keçkenini añlamağan «müstemlekeciler» ile tolduralar.
Bunı o Radio Svoboda efirinde yarımada sakinleriniñ qıtaiy Ukraina vatandaşlarına munasebeti aqqında olğan sualge cevap olaraq ayttı.
«Qırımda vaziyet deñişe. Anda, belki de, «miyi türlü olğan» yerli ealiniñ bir 20% bar. Olarnı deñiştiremezsin. Çoqusı – esli başlı insanlar. Amma Putin rejimi ile ketirilgen insanlarnıñ da ğayet büyük fayızı bar – Qırımnıñ yañı sakinleri. Qırım, Ukraina ne olğanını iç te añlamaylar. Olarnı Burâtiya, Orta yolaqtan ketirdiler – müstemlekeciler, yani. Amma eminim ki, Qırım cemiyetiniñ bu qısmı işğalniñ soñunda evlerine qaytıp keter», – dey o.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
