Link açıqlığı

Saatnıñ esas haberi

Çubarov ve Cemilev Avropa Şurası temsilcilerine Qırımdaki «Stalin rejimi» aqqında tarif ettiler


Cuma künü, sentâbr 4-de, Ukraina Yuqarı Şurasınıñ insan aqları boyunca komitetinde halq deputatları Refat Çubarov (Qırımtatar Milliy Meclisiniñ reisi) ve Mustafa Cemilevniñ (Ukraina prezidentiniñ qırımtatar halqınıñ işlerinden vekâletlisi) Avropa Şurasınıñ insan aqları boyunca bölüginiñ icret meselelerinden keñeşçisi Lilya Gretarstdottir ve Ukrainada Avropa Şurasınıñ Baş kâtibiniñ mahsus temsilcisi Antonina Vıhrest ile körüştiler.

Bu aqta «Petro Poroşenko bloku» ukrain firqasınıñ matbuat hızmeti bildire.

Malümatqa köre, taraflar Ukraina vaziyetini ve Avropa şurasınıñ «Ukrainada mecburen köçip kelgenlerniñ aqları qoruvınıñ arttırılması» degen yañı leyhası çerçivesinde yapılacaq tedbirler planını muzakere ettiler.

«Şimdi Qırım vaziyeti sovet totalitar rejiminiñ eñ beter vaqtını – Stalin zamanını añdıra. Söz serbestligi yoqtır, insanlarnı hırsızlay ve apiske oturtalar. İşğalci akimiyet qırımtatarlarnıñ Qırımnı terk etmesini beklep areket ete», – dedi Cemilev körüşüvde

Taraflar leyhanıñ amelge keçirilmesi boyunca işbirlikni muzakere ettiler. Çubarov yarımada Rusiye tarafından işğal etilgeninden soñ qırımtatarlarnıñ büyük bir qısmı Qırımnı terk etmege mecbur olğanını aytıp, işbu leyhanıñ emiyetini qayd etti.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG