Link açıqlığı

Berezovets: hakerler Qırımda «referendum» neticeleriniñ qalplığını tasdiqlağan delillerni tapqanlar


Free Crimea leyhasınıñ idarecisi Taras Berezovets dey ki, Qrım işğali aqqında kitabında Qırım «referendumı» neticeleriniñ qalplığını tasdiqlağan malümat bar.

Bunı o Kiyevde sentâbr 3 künü «İşğal. Qırım adası» kitabınıñ taqdim etüvi vaqtında bildirdi, haber ete Qırım.Aqiqat.

«Kitapnı yazğanda, açılğan acayip şeylerden biri... Bizge Kreml mektüpleşüvini aşkâr etken Rusiye hakerleri yardım etti, bunı kitapnıñ «referendum»nıñ qalplıqlarına bağışlanğan bölüginde körmege mümkün, o nasıl azırlanıldı, bunı kim yaptı, anda elektron poçtalarınıñ resmiy adresleri bar», – dey Berezovets.

O şunı da dey ki, «Rusiye Federatsiya Şurasınıñ Qırımğa Rusiye ordularınıñ kirsetilmesi aqta qararı da qalp etilgenini» tasdiqlağan deliller bar.

Bütün bular, Berezovetsniñ sözlerine köre, kitapta bardır.

«İşğal. Qırım adası» – Qırımnıñ 2014 senesi fevral 18 – mart 18 kününe qadar etilgen işğali aqqında tarif etken birinci vesiqalı kitaptır.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında »referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG