Link açıqlığı

Rusiye tarafından Qırım işğali aqqında vesiqalı kitapnı – «İşğal. Qırım adası» – Kiyevde, sentâbr 3 künü, Ukrain buhraniy media-merkezinde taqdim ettiler, haber ete Qırım.Aqiqat.

Kitapnıñ müellifi, Free Crimea leyhasınıñ idarecisi Taras Berezovets aytqanı kibi, kitapqa 704 açıq menbadan alınğan malümat kire. Kölemi – 392 saife.

«Qırımnıñ 2014 senesi fevral 18 – mart 18 kününe qadar etilgen işğali aqqında tarif etken birinci vesiqalı kitaptır. Devamlı iş edi. Kitap üzerinde bayağı mütehassıs çalıştı, bu malümatnı umumiyleştirgen ve bir tertipke ketirgen insan edim», – dey Berezovets.

Onıñ sözlerine köre, kitap Ukraina ve Rusiye siyasetçileri, arbiyler, ecnebiy mütehassıslarnıñ ve işbu vaqialarnı yaşağan insanlarnıñ izaatlarına köre yazılğandır.

Berezovets aytqanı kibi, kitap evel basılmağan vesiqalardan ibaret.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG