Akimiyet tarafdarı olğan «Millet» «cemaat» qırımtatar teleradiokompaniyasınıñ baş müdiri Seyran Mambetov telekanalınıñ Herson ve atta Kiyevge yayınlanmasını arz ete. Bunı o RİA Novosti (Krım) neşirine bildirdi.
«Signal Herson vilâyetine yetse, quvanırmız. Bizni seyir etsinler, Qırımda olğanı aqta kerçekni bilsinler. Anda Qırım aqta haberler iç te doğru degildir. Olarnıñ fikrine köre, qırımtatarlarnı ezeler, inkişaf etkenimizni, öz kanalımıznı açqanımıznı körsinler. Bizde er şey yahşı. Kiyevge yayınlamağa tırışacaqmız», – dey o.
Mambetovnıñ aytqanı kibi, «Millet» noyabr 4-den tam şekilde çalışmağa başlaycaq.
Bildirilgeni kibi, «Cemaat qırımtatar teleradiokompaniyası» 2015 senesi iyün 10 künü Qırımnıñ rusiyeli ükümetiniñ avalesi boyunca teşkil etildi. Telekanalnıñ tesisçisi – Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca Devlet komitetidir.
Qırım.Aqiqat mühbiri bildirgeni kibi, yañı qırımtatar telekanalı Qırımda 2014 senesi işğal vaqtında peyda olğan «TNV-Planeta» medeniy-maarif kanalınıñ sıqlıqlarında işlemege başladı.
Öz nevbetinde, «TNV-Planeta» kanalı, bir buçuq yıl evelsi Ukraina qanuniyetine ve Ukrainanıñ telekorüv ve radioyayınlav boyunca Milliy şurasınıñ qararına qarşı, Qırımda yayınlanğan ukrain telekanalınıñ sıqlıqlarını aldı.
«Millet» Seyran Mambetov yolbaşçılığında çalışqan TRK «Krım» («Pervıy krımskiy») telekanalınıñ qırımtatar ve milliy programmalarınıñ negizinde teşkil etildi.
