Qırımnıñ İçki rayonı rusiyeli memuriyetiniñ başı Vladimir Tregub mekteplerde ukrain ve qırımtatar tilleriniñ ögrenilmesi ile bağlı «musaviysizlik»niñ olmaycağını vade ete.
«Ana-babalarnıñ arizaları olğan rayonnıñ er bir mektebinde qırımtatar tiliniñ ögrenilmesi alğışlanıla, çünki o devlet tillerinden biri ola», – dep bildire Tregubnıñ sözlerini raoyn memuriyetiniñ matbuat hızmeti.
Evel tasil naziri Natalya Gonçarova yarımada mekteplerine bu sene qırımtatar tilinde yazılğan dersliklerniñ berilmeycegi aqqında bildirgen edi.
«Maarif» qırımtatar tasil hadimleriniñ birligi 2015-2016 oquv yılları arfesinde Qırımnıñ rusiyeli başı Sergey Aksenovğa yarımadada qırımtatar tilinde tasil meseleleriniñ çezilmesinde muayyen qararlarnı almaq teklifi ile muracaat etti.
Bundan evel Qırımtatar Milliy Meclisiniñ temsilcileri ve cemaatçılar, Qırım Rusiye nezareti altına keçkenden soñ, yarımadada devlet tilleriniñ ögrenilmesine ayırılğan saatlerniñ teñ olmağanı aqta bildirgen ediler.
