ATR qırımtatar telekanalı sentâbr 1 künü on yıllıq yubileyini qayd ete, bu künni hadimler Kiyevde qarşılaylar.
Bunı Qırım.Aqiqatqa telekanal baş müdiriniñ muavini Ayder Mujdabayev bildirdi.
Onıñ aytqanına köre, «memleket ve halq içün bu ağır vaqıtta keyf çatmağa yersizdir. Bugün Kiyevde on yıllıq yubileyni qarşılasaq, demek – ATR telekanalınıñ ağzını kimse qapatıp olamadı. Qırımtatarlarnıñ öz şimdiki vaziyetine boyun egeceklerine ümüt bile olmamaq kerek», – dey Ayder Mujdabayev.
O şunı da qayd etti ki, telekanal hayırlavlarnı Qırımdan da qabul ete, anda telekanalnı, Mujdabayev degeni kibi, «dünyada eñ sadıq seyirciler» baqa.
ATR qırımtatar telekanalı 2015 senesi aprel 1-den Qırımda işini toqtatmağa mecbur edi. 2015 senesi iyün 17-den kanal Kiyevde işlemege başladı.
Qırımda salı künü, sentâbr 1-de, «Millet» cemaat qırımtatar teleradiokompaniyası işke başladı.
