Aqmescitniñ Bavurçı (Kamenka) qasabasınıñ Eşref Şemi-zade adına №42 orta umumtasil mektebinde yedi birinci sınıf açıldı, amma olardan tek üç sınıfta balalarnı ana tilinde ögretecekler, qalğan sınıflardar – rusça.
Bunı Qırım.Aqiqat mühbirine çorlanğan ana-babalar tarif etti.
«Biz, ana-baba olıp, bu sene, misal içün, rus tilli sınıflarnıñ sayısı, qırımtatar sınıflarına köre, daa da çoq olğanından çorlanamız. Eñ külünçlisi şu ki, bu qırımtatar milliy mektebinde ola. Diger, adiy mekteplerde olğanını tüşünmege bile istemeyim», – dedi analardan birisi.
«Özümiz şeerniñ diger tarafında, Pnevmatikada, yaşaymız. Balamız ana tilinde oqusın dep, onı milliy mektepke bermege qarar aldıq. Amma qırımtatar tilli ögretüvi ile yalıñız üç sınıf olacağını ögrenip, şaştıq», – dedi birinci sınıf talebesi Refatnıñ anası Niyara.
Qırım.Aqiqat bildirgeni kibi, sentâbr bir künü Aqmescitniñ Eşref Şemi-zade adına №42 orta umumtasil mektebinde bayram politsiya hadimleriniñ nezareti altında keçti.
«Maarif» qırımtatar tasil hadimleriniñ birligi 2015-2016 oquv yılları arfesinde Qırımnıñ rusiyeli başı Sergey Aksenovğa yarımadada qırımtatar tilinde tasil meseleleriniñ çezilmesinde muayyen qararlarnı almaq teklifi ile muracaat etti.
Bundan evel Qırımtatar Milliy Meclisiniñ temsilcileri ve cemaatçılar, Qırım Rusiye nezareti altına keçkenden soñ, yarımadada devlet tilleriniñ ögrenilmesine ayırılğan saatlerniñ teñ olmağanı aqta bildirgen ediler.
Birinci sınıfqa Qırımda 18 461 bala baracaq, 11-inci sınıfqa – tahminen 11 biñ bala.
