Link açıqlığı

Saatnıñ esas haberi

Qırımda akimiyet tarafından teşkil etilgen «Millet» qırımtatar telekanalı işke başladı


Qırımda salı künü, sentâbr 1-de, «Millet» cemaat qırımtatar teleradiokompaniyası işke başladı.

Qırım.Aqiqat mühbiri bildirgeni kibi, yañı qırımtatar telekanalı Qırımda 2014 senesi işğal vaqtında peyda olğan «TNV-Planeta» medeniy-maarif kanalınıñ sıqlıqlarında işlemege başladı.

Öz nevbetinde, «TNV-Planeta» kanalı, bir buçuq yıl evelsi Ukraina qanuniyetine ve Ukrainanıñ telekorüv ve radioyayınlav boyunca Milliy şurasınıñ qararına qarşı, Qırımda yayınlanğan ukrain telekanalınıñ sıqlıqlarını aldı.

«Millet» Seyran Mambetov yolbaşçılığında çalışqan TRK «Krım» («Pervıy krımskiy») telekanalınıñ qırımtatar ve milliy programmalarınıñ negizinde teşkil etildi.

Bildirilgeni kibi, «Cemaat qırımtatar teleradiokompaniyası» 2015 senesi iyün 9 künü Qırımnıñ rusiyeli ükümetiniñ avalesi boyunca teşkil etildi. Telekanalnıñ tesisçisi – Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca Devlet komitetidir.

Qırım.Aqiqat bildirgeni kibi, Qırımtatar Milliy Meclisiniñ reisi Refat Çubarov Qırımda Rusiye akimiyeti tarafından teşkil etilgen yañı qırımtatar teleradiokompaniyası «yarımada işğalcileriniñ teşviqat aleti» olacağını qayd etken edi.

ATR qırımtatar telekanalı 2015 senesi aprel 1-den Qırımda işini toqtatmağa mecbur edi. 2015 senesi iyün 17-den kanal Kiyevde işlemege başladı.

XS
SM
MD
LG