Link açıqlığı

Aqmescitniñ qırımtatar mektebinde bilgi künü politsiya nezareti altında keçti


Aqmescitniñ Bavurçı (Kamenka) qasabasınıñ Eşref Şemi-zade adına №42 orta umumtasil mektebiniñ birinci sınıfına bu sene tahminen yüz bala keldi. Mektep bu sene on yıllıq yubileyini qayd ete.

Qırım.Aqiqat mühbiri bildirgeni kibi, bayram politsiya hadimleriniñ nezareti altında keçti.

Bayramnı Rusiye gimni ile açtılar, soñra qırımtatar marşı yanğıradı. Soñkini bulunğanlardan aman-aman er kes yırladı.

«Men içün gimnimiz (qırımtatar – QA) eñ müimdir. Onıñ sözlerini birinci sınıftan ögrene edik. Ve böyle künleri onı yırlamağa – büyük memnüniyettir», – dey 8 sınıf talebesi Lemara.

Bayramda QMC nam qazanğan artisti Asiye Saale «Yaşa menim halqım» vatanperver yırı ile çıqışta bulundı.

Mında Qırımnıñ rusiyeli Devlet şurasınıñ spiker muavini Remzi İlyasov, «Qırım» areketiniñ yerli faalleri ve yerli akimiyet temsilcileri buluna edi.

Cemaat nizamını Rusiye politsiyası ve GİBDD hadimleri qoruy edi.

Bu sene Qırımda 18 641 bala birinci sınıfqa baracaq. Qırım ükümetiniñ Tasil nazirliginiñ malümatına köre, birinci derste talebelerge GTO (emek ve mudafaağa azırım) areketi aqqında tarif etecekler.

Evel tasil naziri Natalya Gonçarova yarımada mekteplerine bu sene qırımtatar tilinde yazılğan dersliklerniñ berilmeycegi aqqında bildirgen edi.

XS
SM
MD
LG