Link açıqlığı

Roskomnadzor «Millet» telekanalı ve «Vatan sedası» radiostantsiyasına litsenziyalarnı berdi – Polonskiy


Qırımnıñ rusiyeli Nazirler şurasınıñ reisi muavini Dmitriy Polonskiy aytqanı kibi, «Millet» telekanalı ve «Vatan sedası» radiostantsiyası Roskomnadzor tarafından litsenziyanı elde etti. Bunı Qırımnıñ rusiyeli ükümetiniñ matbuat hızmeti bildire.

Litsenziya sentâbr ayından telekompaniya ve radiostantsiyağa gece-kündüz çalışmağa izin bere, dey Polonskiy.

«Bugünge eki kütleviy haber vastasınıñ – «Millet» telekanalı ve «Vatan sedası» radiostantsiyasınıñ Rusiye qanuniyetine köre qayd etüv ketişatı yekünlengen: universal litsenziyalarnı elde etkenler. Böyleliknen, yayınlavnıñ alıp barılması mümkün oldı», – dey Qırım Nazirler şurasınıñ reisi muavini.

Bildirilgeni kibi, «Cemaat qırımtatar teleradiokompaniyası» 2015 senesi iyün 9 künü Qırımnıñ rusiyeli ükümetiniñ avalesi boyunca teşkil etildi. Telekanalnıñ tesisçisi – Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca Devlet komitetidir.

Qırım.Aqiqat bildirgeni kibi, Qırımtatar Milliy Meclisiniñ reisi Refat Çubarov Qırımda Rusiye akimiyeti tarafından teşkil etilgen yañı qırımtatar teleradiokompaniyası «yarımada işğalcileriniñ teşviqat aleti» olacağını qayd etken edi.

ATR qırımtatar telekanalı 2015 senesi aprel 1-den Qırımda işini toqtatmağa mecbur edi. 2015 senesi iyün 17-den kanal Kiyevde işlemege başladı.

XS
SM
MD
LG