Qırımda avgust 29 künü ölü alda tapılğan Memet Selimov ve Osman İbragimovnıñ öldürüvinde qabaatlanğan şahısnı yaqaladılar. Bunı bazar künü Meclis reisiniñ muavini Nariman Celâl Facebookta bildirdi.
«Bugün saba bildirilgeni kibi, qatil tapıldı. Soñki malümatqa köre, qatil ve gençler arasında ziddiyet qız içün yüz berdi. Sarhoş edilermi, şimdilik daa belgisizdir, amma yaşlarnıñ tanışları olarnı terbiyeli ve içmegen, eñ azından, çoq içmegen kibi tanıtalar», – dey Meclis reisiniñ muavini.
Qırımnıñ Taqiqat komiteti de işbu malümatnı tasdiqlay.
Avgust 21 künü ğayıp olğan Aqmescit rayonınıñ sakinleri Memet Selimov ve Оsman İbragimov cumaertesi künü, avgust 29-da, ölü tapıldılar. Cesetlerini Aqmescit civarındaki köy qavehanesi yanında kömgen ediler.
Bildirilgeni kibi, 1986 senesi doğma Memet Selimov ve 1988 senesi doğğan Osman İbragimovnıñ belgisiz şahıslar tarafından Aqmescit civarıda tutulması mümkün edi.
Qırım işğalinden soñ yarımadada bir qç qrımtatarı belgisiz ğayıp oldı. Qırımda taqiqat komiteti cinaiy işlerni açsa bile, bu insanlarnıñ bulunuv yerleri aqqında alâ daa malümat yoq.
