Link açıqlığı

Qırımda yaş ocalar içün yer yoq, olarnı Rusiye regionlarına yollaylar


Bugün Qırımnıñ umumtasil mekteplerinde ocalar içün boş yer yoq derecededir. Bunı matbuat konferentsiyasında Qırımnıñ tasil, ilim ve gençlik naziri Natalya Gonçarova bildire, yaza Novosti Krıma.

«Qırımda boş yer aman-aman yoq, bundan da ğayrı, şeerlerde — Aqmescit, Kezlev, Yalta, Aluşta, Kefede ocağa ayırılğan orta seviyeli yük — bir stavka civarında. Yani, er şey tertipke ketirilgen», – dey şimdiki nazir.

Köy ve rayon mekteplerinde, dey Gonçarova, birer yer bar — informatika, esap, muzıka ocası.

O şunı da qayd etti ki, universitetler ocalıq yönelişine studentlerni qabl etkende, yarımadanıñ ocalarğa ihtiyacını nazarğa almağan edi.

«Şunıñ içün bugün iş yerleriniñ olmaması içün mesüliyetni yalıñız tasil nazirligine yüklemege mümkün degil. Mında universitetler de mesüliyetlidir«, – dey Gonçarova.

Nazir dey ki, bugün Rusiye Federatsiyasınıñ diger subyektlerinde boş yerler bardır ve tasil nazirligi muracaat etken er bir kişige bunı bildire.

XS
SM
MD
LG