Avgust 21 künü ğayıp olğan Aqmescit rayonınıñ sakinleri Memet Selimov ve Оsman İbragimov cumaertesi künü, avgust 29-da, ölü tapıldılar. Bunı Meclis reisniñ muavini Nariman Celâl bildirdi.
«Maña milliy areket iştirakçisi Mustafa Hairov bildirgeni kibi, avgust 21 künü ğayıp olğan Selimov Memet ve İbragimov Osman pıçaq yaraları ile ölü alda tapılğanlar. Cesetlerini Aqmescit civarındaki köy qavehanesi yanında kömgen ediler», – yazdı o Facebookta.
Onıñ aytqanı kibi, diger qaynaqlarğa köre, öldürüvde şeklengen insannıñ şahısı belgilendi, amma o daa yaqalanmağan, qıdıruvğa ilân etilgendir.
«Taqiqatnıñ fikrine köre — sarhoş dögüş neticesinde yüz bergen turmuş öldürüvidir», – dey Celâl.
Qırımnıñ uquq qoruyıcı organlarından resmiy izaat daa yoq.
Bildirilgeni kibi, 1986 senesi doğma Memet Selimov ve 1988 senesi doğğan Osman İbragimovnıñ belgisiz şahıslar tarafından Aqmescit civarıda tutulması mümkün edi.
Qırım işğalinden soñ yarımadada bir qaç qrımtatarı belgisiz ğayıp oldı. Qırımda taqiqat komiteti cinaiy işlerni açsa bile, bu insanlarnıñ bulunuv yerleri aqqında alâ daa malümat yoq.
