Qırım rejissörı Galina Cikayevanıñ «Sönük zona» oyunı ilk sefer Kiyevde kösterildi. Qırım.Aqiqat mühbiri bildirgeni kibi, vesiqalı oyun köçip kelgenlerniñ ikâyelerine esaslanıp qoyuldı.
Beş aktör ve ondan ziyade obraz – işbu oyun «Serbest insanlar evi»nde kösterildi.
«Menim içün o qadar qıymetli bir oyun. Donetsk, Qırımdan degilim, Kiyevde yaşayım ve bu oyun maña «tiydi». Qattı, tam ve mündericeli. Kiyev sakinleriniñ bu oyunnı körgenlerini isteyim», – dey seyircilerden biri.
Rejissörnıñ özü aytqanı kibi, işbu oyun koçip kelgenler içün degil de, Qırım, Donetsk, Lugansktan kelgen insanlarnıñ körgen şeylerini körmegen yerli sakinler içün sanalaştırıldı.
«Olduqça raat yaşağan insanlarğa olarnıñ yanında acı, qayğı olğanını hatırlatmaq kerek. Bu oyunnı köçip kelgenler içün degil, çünki olar öz-özlerini körerler, er şey olardan uzaq olğanını tüşüngen insanlar içün oynadıq. Amma aqiqaten bu er keske ait», – dey Galina Cikayeva.
«Sönük zona» – interaktiv oyun, mında seyirciler aktörlar arasında buluna ve areketniñ iştirakçileri ola. Qaramanlar öz monologını oquy ve öz ayatiy ikâyesini añlata. Oyunda seyircilerge farqlı obrazlar, farqlı noqtaiy nazarlar ve mevamlar taqdim etile.
İçtimaiy siyaset nazirliginiñ soñ malümatına köre, Ukrainada şimdi Donbass ve Qırımdan 1 million 428 biñ 77 köçip kelgen insan bar.
