Link açıqlığı

Meclis reisiniñ muavini qırımtatarlar üzerinde keçirilgen mahkemelerge barmağa ve mertlik köstermege tevsiye ete


Qırımtatar Milliy Meclisiniñ reisi muavini Nariman Celâl avgust 28 künü Qırım Yuqarı mahkemesiniñ toplaşuvından olğan teessuratları ile paylaştı. Mında «fevral 26» işi boyunca yaqalanğan Mustafa Degermenciniñ şikâyet arizasını red ettiler.

«Qanunsız sürette qabaatlanğan Ahtem Çiygoz, Ali Asanov, Mustafa Degermenci, tuvğanları, dostları, cemaattan nice senelerge ayırılmaq istiqbaline baqmadan, cesürlik ve sebat nümünesi olalar», – dep yazdı Celâl Facebookta ve apiste bulunğanlarnıñ fotolarını paylaştı.

«Bugün serbestlikte öz kölgesinden qorqqan, iş yerini tüşüngen, özü ve aqları bozulğan vatandaşlarına arqa olmağa saqınğanlarğa işbu mahkeme toplaşuvlarına barıp, qaramanlarımızğa baqmağa tevsiye eter edim. Belki, bundan soñ olar, iç olmağanda, halq aqlarınıñ qoruvı aqta muracaatlarnıñ altına imzalarını qoyarlar», – dey o.

Avgust 28 künü Aqmescitte mahkeme «fevral 26» işi boyunca apiste bulunğan qırımlı Mustafa Degermenciniñ şikâyet arizasını red etti.

Mustafa Degermenci mayıs 7 künü Sudaqnıñ Suvuq Sala qasabasına yaqalandı.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı.

XS
SM
MD
LG