Qırımtatar Milliy Meclisi reisiniñ birinci muavini Nariman Celâl dey ki, Aqmescitte avgust 28 künü mahkeme «fevral 26» işi boyunca apiste bulunğan qırımlı Mustafa Degermenciniñ şikâyet arizasını red etti.
Bu aqta Celâl Qırım.Aqiqatqa bildire.
«Mahkeme, Ahtem Çiygoz ile olğanı kibi, imayeniñ şikâyetini red etti. Degermenci apiste noyabr 7-ne qadar bulunacaq», – dey Celâl.
Qırımda 2015 senesi avgust 19 künü Aqmescit Kiyev rayon mahkemesinde 2014 senesi fevral 26 künü Qırım parlamenti divarları yanındaki tertipsizlikte iştirak etüvde qabaatlanğan Mustafa Degermenciniñ işi boyunca mahkeme toplaşuvı keçti. Erkekniñ apis müddetini 3 ayğa arttırdılar.
Mustafa Degermenci mayıs 7 künü Sudaqnıñ Suvuq Sala qasabasına yaqalandı.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı.
