Link açıqlığı

Smedlâyev: mahkeme «fevral 26» işi boyunca apiste bulunğan qırımlınıñ şikâyet arizasını baqacaq


Aqmescitte avgust 28 künü mahkeme «fevral 26» işi boyunca apiste bulunğan Mustafa Degermenciniñ şikâyet arizasını baqacaq. Bunı Qurultaynıñ Merkeziy saylav komissiyasınıñ reisi Zair Smedlâyev bildirdi.

«Mustafa Degermenciden, Ali Asanovdan kibi, Ahtem Çiygozğa qarşı delillerniñ berilmesini talap eteler», – yazdı o Facebookta.

Qırım uquq qoruyıcıları ve mahkeme organları işbu ketişatlarnı adet üzre izaatlamay.

Mustafa Degermenci mayıs 7 künü Sudaqnıñ Suvuq Sala qasabasına yaqalandı.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar.

XS
SM
MD
LG