Link açıqlığı

Enver İzmaylovnı Ukrainağa «Kiselev aqşamında» iştirak etüvi sebebinden kirişi yasaqlanacağ ecnebiylerniñ cedvelinden çıqardılar


Ukraina Medeniyet nazirligi Ukraina halq artisti, Ukraina vatandaşı Enver İzmaylovnı Kоktebelde Koktebel Jazz Party tedbirinde iştirak etüvi sebebinden kirişi yasaqlanacağ ecnebiylerniñ cedvelinden çıqardı.

Bu cedvel avgust 17 künü aşkâr etilgen edi.

Qırım.Aqiqat Medeniyet nazirligine Ukraina vatandaşına Ukraina kirişini nasıl etip yasaqlamağa mümkün olğanı aqta mektübini yollağanından soñ İzmaylovnıñ adını cedvelden aldılar.

Qırım.Aqiqatnıñ soravına kelgen cevapta böyle yazıla: «Oña qarşı Avropa birligi, Kanada, İsveçre ve Ukraina cezaları kirsetilgen Rusiye alıp barıcısı, Rusiye Federatsiyası prezidenti Vladimir Putinniñ Qırım boyunca mevamını ve memleketimizniñ şarqındaki istilâsına qol tutqan Dmitriy Kiselev tarafından işğal etilgen territoriyada azırlanılğan tedbirlerde iştirak etken ecnebiy artistler istilâğa ve memleketimizniñ topraq bütünliginiñ bozuluvına destegini bildirecekler».

«Böyle ise, işbu artistler «Cezalar aqqında» ve «Ukraina haber tele ve radio alanınıñ qoruvı ile bağlı Ukraina qanunlarına deñişüvlerniñ kirsetilmesi aqqında» Ukraina qanunlarına köre mesüliyet körmeli.

Bunıñ ile nazirlikte deyler ki, qıtaiy Ukrainağa köçken qırımlı-sanat erbaplarına er taraflama destek kösterile.

Ukraina Medeniyet nazirliginiñ beyanatında aytılğanı kibi, Koktebel Jazz Party tedbirinde iştirak etecek ecnebiy çalğıcılar sanktsiyalarğa oğray bile.

Ukraina Medeniyet nazirligi bu bildirüvini aşkâr etkeninden soñ, Koktebel Jazz Party saytından festival programması yoq oldı. Böylece, çalğıcılardan angi soyları çıqışlarını lâğu etkenini ögrenmege imkânsız.

Ukraina Medeniyet nazirliginiñ cedvelinde 25 çalğıcı bar edi, olarnıñ arasında Enver İzmaylov – belli qırımtatar gitara çalğıcısı ve Ukraina halq artisti.

Çalğıcınıñ bu aqta fikirlerini şimdilik ögrenip olamadıq. Qırım.Aqiqatnıñ mühbiri izaatını sorağanda, İzmaylov onda «intervyü yasağı» olğanını bildirdi.

Aynı zamanda, qırımlı ukrain yırcısı Camala İzmaylovnıñ Koktebelde Dmitriy Kisilevnıñ tedbirinde iştiraki aqqında «öşeklerni» izaatlamadı.

«Öşeklerni izaatlamaq ve böyleliknen belli ve sevimli çalğıcını lekelemege istemeyim… Medeniyet nazirligimizge öz evinde çıqışta bulunacaq artistlerge Ukrainakirişini yasaq etmek yerinde leyhalar üzerinde çalışmağa tiler edim. Kiyevde qırımtatar muzıkası festivalini teşkil etsinler, faydası daa da büyük olur», – dedi o Qırım.Aqiqatqa.

Yırcı memurlarğa ömür boyu Qırımda yaşağan ve «muzıkası ava kibi kerek olğan» çalğıcılar ne yapmalı kibi sualni tüşünmege tevsiye etti.

Camala Kiselevnıñ tedbirini siyasiy PR-aktsiya olaraq adladı

«Rossiya segodnâ» baş müdiri Dmitriy Kiselev işğal etilgen yarımadada avgust 28-30 künleri «Koktebel Jazz Party» festivalini keçire.

XS
SM
MD
LG