Ukraina haber siyaseti nazirligi qırımtatar tilinde çalışacaq «Millet» Rusiye devlet telekanalınıñ ve «Vatan sedası» radiostantsiyasınıñ faaliyetini teşkercek, dep bildire nazir keñeşçisi Sergey Kоstinskiy.
«Ukraina territoriyasında bu kibi matbuat vastalarınıñ çalışuv qanuniyligi ile bağlı sual Ukraina Haber siyaseti nazirligi yanında çalışqan milliy telekorüv ve radioyayınlav sistemasınıñ teminlevi meseleleri boyunca komissiya toplaşuvınıñ kün tertibine qoyulacaq», – dep bildire Kostinskiyniñ sözlerini matbuat hızmeti.
Nazir keñeşçisi dey ki, «Millet» ve «Vatan sedası»nıñ qullanğan maddiy-tehnikiy bazasını ve işğal etilgen Qırımda çıqacaqsıqlıqlarnı ögrenmek kerek.
O, işğal etilgen territoriyalarda çalışqan Rusiye devlet şirketleriniñ Avropa şirketleri ile ticariy işbirlik qanuniy olamı, yoqmı – kibi meseleniñ ögrenilmesine israr ete.
Sergey Kostinskiy aytqanı kibi, Haber siyaseti nazirligi Ukraina telekorüv ve radioyayınlav meselelri boyuca Milliy şurağa endi mektüp yollağandır. «Ukraina qanuniyetiniñ bozuluvı olsa, telekanalnıñ ukrain operatorlarınıñ paketlerine kirsetilmesi yasaqlana bile», – dey o.
Evel Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca devlet komitetiniñ reisi Zaur Smirnov Rusiye devlet matbuat vastaları – «Millet» telekanalı ve «Vatan sedası» radiostantsiyası tek Qırımda degil de, Ukraina qıtasında da çalışacağını bildirgen edi.
ATR qırımtatar telekanalı 2015 senesi aprel 1-den Qırımda işini toqtatmağa mecbur edi. 2015 senesi iyün 17-den kanal Kiyevde işlemege başladı.
