«Almenda» vatandaşlıq maarif merkeziniñ tasil programmalarınıñ koordinatorı Valentina Potapova Kiyevde avgust 27 künü keçirilgen matbuat konferentsiyasında 2014 senesi Qırım studentlerine stipendiya berilmegeninden sebep Ukraina büceti 130 million grivna iqtisat etkeni aqqında bildirdi, haber ete Qırım.Aqiqat.
«Sorav yiberdik, Qırım işğali devamında studentlerge berilmegen stipendiyada 136 million grivna iqtisat etildi. Devlet büceti esabına çalışqan 18 aliy oquv yurtu bar edi. 18 – binalar, yarıq, suv, hadimlerniñ, oca, hızmetçilerniñ aylığı. Bu para on dört senesinde belgisiz yoq oldı», – dey Potapova.
O şunı da qayd etti ki, bu aqçanı Ukrainada tasil almağa istegen Qırım vatandaşlarına qol tutmaq içün tasil programmalarına masraf etmege mümkün edi. Ve memurlarnı 2014 senesi Qırımğa ayırılğan paranı qaytarmağa çağırdı.
Ukraina Tasil nazirliginiñ soñ malümatına köre, işğal etilgen Qırımnıñ tahminen biñ sakini 2015 senesi Ukraina aliy oquv yurtularına kirdi.
