Link açıqlığı

Saatnıñ esas haberi

Qırımtatar rejissörı Poroşenko ile «duyğulı ve sert» subeti aqqında tarif etti


Qırımtatar rejissörı ve QMC nam qazanğan artisti Ahtem Seytablayev avgust 26 künü Ukraina prezidenti Petro Poroşenkonıñ cemaatçılıq erbapları ile körüşüvinde muzakere etilgen Qırım meseleleri aqqında tarif etti.

Seytablayevniñ aytqanı kibi, prezident ile subet üç saat devam etti.

«Qorqu, dert ve ümüt aqqında duyğulı, sert ve, inanam ki, faydalı bir subet edi… Anayasa bazı maddelerinde olacaq deñişüvler, detsentralizatsiya, akimiyet ve cemaatçılıqnıñ munasebeti, memleketni birleştirecek medeniyet aqqında laf ettik», – yazdı Facebookta artist.

O şunı da qayd etti ki, «bazı suallerge temelli cevap berilgen edi, bazılarına yoq».

«Qırım ve onıñ ile sıñır aqqında soradım, belli ki, anda problemalarnıñ sayısı büyüktir. Eşittim – qırımtatar batalyonınıñ teşkil etilmesi aqta qarar alındı, mesüliyeti – Qırım ile sıñır olacaqtır. Qırımtatarlarnıñ gümrük ve sıñır hızmetlerinde temsilciligi büyük olacaq eken», – dey Seytablayev.

«Prezidentten Qırımnıñ qaytarıluvı – Ukraina devleti ve akimiyeti içün bir sınav olğanını eşittim», – dep qoştı o.

Rusiye Qırımnı 2014 senesi mart ayında işğal etti.

XS
SM
MD
LG