Link açıqlığı

Qırımtatar milliy areket iştirakçisi, Qurultaynıñ Merkeziy saylav komissiyasınıñ reberi Zair Smedlâyev qırımlı Оleg Sentsov ve Aleksandr Kоlçenkonıñ işlerini «sımarlanğan esnas» olaraq adladı.

«Bu toplaşuv nasıl tsinizm ile keçirilgenini köremiz. Üküm uydurılğan bir iş boyunca çıqarıldı», – dedi Smedlâyev Qırım.Aqiqatqa.

O dey ki, işbu iş «fevral 26» ve «mayıs 3» işleri ile bir sırada tura. Qırımdan Yevromaydan faali Aleksandr Kоstenkonıñ ükmü, Qırımtatar Milliy Meclisi reisniñ muavini Ahtem Çiygoznıñ tevqif etilmesi ve ilâhre.

«Bütün bularnı faal ealini qorquzmaq, qorqu saçmaq maqsadı ile yapıla, insanlar artıq kütleviy tedbirlerge qoşulmasın, memlekette yüz bergen adiseler boyunca memnüniyetsizlikni bildirmesin, memurlarnıñ areketlerine qarşı çıqmasın dep etile», – qayd etti o.

O dey ki, Qırımda baqılğan işlerniñ iştirakçilerine de bu kibi cezalarnıñ berilmesi mümkün.

Bunıñ ile o, vaziyetniñ yaqında deñişecegine ümüdini bildirdi. «Bugün qanunsız qararlarnı çıqarğanlar yaqında özleri maznunlarnıñ yerine keçer. Bunıñ yaqın kelecekte olacağına ümüt etem», – dey Smedlâyev.

Rostov-na-Donu şeeriniñ Şimal-Kavkaz arbiy bölge mahkemesi ukrain rejissöri Oleg Sentsov ve Qırım faali Aleksandr Kolçenkoğa üküm çıqardı. Rusiyede olarnı «teraktlarda» qabaatlaylar.

«Bu madde boyunca mahkemeci Sentsovnı 15 yılğa qadar azatlıqtan marum qaldıra. Diger vaqialar (ateşke berüv) – 10 ve 11 sene. «Ealini qorqutmaq» içün patlavlarnı azırlağanı içün – 7 yıl. Patlav maddeleriniñ qanunsız elde etmesi içün – 5 yıl. Silânı qanunsız alda aluv – 5 yıl. Umumen – sert rejimde 20 yıl», – dep haber ete Qırım.Aqiqat.

Rusiye akimiyeti Sentsov ve Kolçenkonı Rusiyede yasaq etilgen «Pravıy sektor» ukrain teşkilâtınıñ azaları olaraq ilân etti. Taqiqatqa köre, olar bir sıra Qırım şeerinde terroristik aktlarnı keçirecek ediler, bundan ğayrı, demir yol köpürleri, elektrik yollarını yoq etmek kerek ediler. Ekisi de yaqalanğanından berli qabaatını red ete. Sentsov mahkemede bergen malümatına köre, FSB hadimleri oña basqı yapıp, kerekli malümatlarnı alacaq ediler.

Oleg Sentsov – ukrain rejissöri ve faal, 2014 senesi mayıs ayında Qırımda Rusiye mahsus hızmetleri tarafından yaqalandı ve yarımadadan Rusiyege çıqarılıp, anda SİZOda buluna.

Aleksandr Kolçenko da 2014 senesi mayısta Qırımda yaqalanğan edi. Bu iş boyunca Rusiye mahsus hızmetleri Gennadiy Afanasyev ve Aleksey Çirniy de yaqalanğan ediler.

XS
SM
MD
LG