Link açıqlığı

Türkiye ve Amerika Qoşma Ştatlarınıñ arbiy hızmetleri «İslam devleti» ile küreş aqqında añlaştılar. Bunı salı künü, avgust 25-te, Türkiye tış işler naziri Mevlüt Çavuşoğlu bildirdi.

«İslam devletine» qarşı arbiy tedbirlerde regional ve avropalı ittifaqdaşlar da iştirak etecek. Birinciden boyeviklerni uzaqlaştırmağa ve Suriye muhalifeti ve Suriye prezidenti Başar Asad ordusınıñ sabıq askerleri ve zabitlerinden ibaret olğan Serbest Suriye ordusınıñ nezareti altında Suriyeniñ şimalinde yüz kilometrlik serbest zonanı meydanğa ketirmege planlaştırıla, – dep haber ete «Hürriyet» gazetası.

Suriye muhalifetiniñ askerlerini avada halqara koalitsiyanıñ aviatsiyası qoruycaq.

Ankara Suriye ile sıñırda yerleşken «İncirlik» aviabazasını Amerika arbiylerine «İslam devletine» ücüm etmek içün qullanmağa izin berdi, – dep haber ete Radio Svoboda.

Amerika Qoşma Ştatlarında ve bir sıra diger memlekette terroristik olaraq tanılğan «İslam devleti» İraq ve Suriye topraqlarını qısmen zapt etip, qomşu memleketlerniñ havfsızlığı içün telüke taşıy.

XS
SM
MD
LG