Link açıqlığı

İnsan aqları Qırım alan missiyası bildire ki, Keriçte avgust 24-te politsiya Ukraina bayrağı ile çıqarılğan foto içün üç insannı yaqaladı. Bunı uquq qorçalayıcılarğa yaqalanğanlardan biriniñ anası bildirdi.

Onıñ aytqanına köre, eki erkek ve bir qız avgust 24-te saba saat 7-de Keriç merkezindeki Mitridat dağında Ukraina bayrağı ile foto çıqaracaq ediler. Gençler bu şekilde Ukraina mustaqillik Kününi qayd etmege istediler.

Olar Ukraina bayrağı ile foto çıqardılar, birden politsiya keldi ve üçüni de pis laflardan sebep yaqaladı. Protokol tizilgen soñ politsiya olarnı mahkeme zalına alıp ketti

«Olar Ukraina bayrağı ile foto çıqardılar, birden politsiya keldi ve üçüni de pis laflardan sebep yaqaladı. Protokol tizilgen soñ politsiya olarnı mahkeme zalına alıp ketti», – dep tarif etti qadın.

Yaqalanğanlarnıñ bildirgenine köre, politsiyada yaqalav sebebi Ukraina bayrağı ve Ukraina tuğrası ve oña qoltutuv yazısı ile kölmek olğanını ayttılar.

Uquq qorçalayıcılarnıñ malümatına köre, aynı o kün mahkeme Rusiye Federatsiyası Memuriy bozuvlar Kodeksiniñ 20.1 maddesi boyunca (nizamnı bozuv) üküm çıqardı. Oğlanlardan birini 15 künge qadar apiske aldılar, digerine 1000 rublelik para cezası berildi.

«Qıznıñ işi avgust 25-te baqılacaq, çünki bazarertesi künü şaatlardan biri yañlış malümat berse, cezalanacağını ögrenip, malümat bermekten vazgeçti ve vaqianı körmegenini bildirdi», – dep qayd eteler missiyada.

Uquq qoruyıcı ya da mahkeme organları vaqianı izaatlamaylar.

Qırım.Aqiqat bildirgeni kibi, Ukraina mustaqillik künü Qırımda Aqmescitteki Taras Şevçenko eykeline çeçekler qoyulğan edi. Mında politsiya hadimleri, adiy urbada insanlar, em de samooborona nevbetçilik yaptılar. Bazı adamlarnı politsiya bölügine alıp ketken ediler. Yaqalanğanlar arasında – Ukrain medeniyet merkeziniñ vekilleri.

Aqmescitteki cemaat faalleri Ukraina mustaqillik Künü munasebetinen aktsiyanı keçirecek ediler, lâkin Aqmescitniñ şeer memuriyeti buña izin bermedi.

XS
SM
MD
LG