Link açıqlığı

Saatnıñ esas haberi

Aqmescitte qırımtatar ressamınıñ şahsiy sergisi açıldı


Qırımtatar medeniyet-tarih mirası müzeyiniñ sergi zalında ressam Enver İzetovnıñ 60 yaşına bağışlanğan «Put k istokam» («Tamırlar yolu») sergisi açıldı.

Qırım medeniyet nazirligi ve qırımtatar müzeyi teşkil etken sergide müellifniñ 40-tan ziyade eseri numayış etile, dep haber ete Qırım.Aqiqat mühbiri.

Qırım Rusiye ükümetiniñ medeniyet naziriniñ muavini İsmet Zaatovnıñ aytqanına köre, Enver İzetov – «qırımtatar resim sanatı tarihında büyük bir ad».

«Onıñ icadını ekige bölmek mümkün: doğğan ve ösken sürgünlik yerleri ve Qırımğa qaytqan soñ yaşayışı. Özbekistanğa o belli bir derecege çıqqan edi, digerleri farqlı sebeplerden bunı yapamağan ediler. Enver bey yaş olğanına baqmadan, özüni resim, kitap resimleri, em de multiplikatsiyada sınap baqtı», – dep qayd etti İzetov.

Tedbir açılışında Qırımtatar ressamları birliginiñ vekilleri Ayder Aliyev ve Ramazan Üseinov, Aqmescit tarihınıñ müzey müdiri İrina Vdoviçenko, «Yañı dünya» gazetasınıñ baş muarriri Zera Bekirova ve digerleri iştirak ettiler.

Enver İzetovnıñ sergisi sentâbr soñuna qadar devam etecek.

Enver İzetov Özbekistannıñ Ferğana vilâyetinde dünyağa keldi. 1980 senesi Ferğana sanat oquv yurtınıñ resim bölügini bitirdi. 1990 senesinden başlap SSCB ressamları birliginiñ azası, 1991 senesinden başlap – Özbekistan ressamları birliginiñ azası. 1992 senesinden başlap 2001 senesine qadar – Qırımtatar ressamları birliginiñ reisi. Qırımdaki kitap neşriyatları ve gazeta muarririyetlerinen iş tuta. Eserleri Özbekistan, Rusiye, Ukraina, Türkiye, Almaniya, Amerika Qoşma Ştatları ve İsviçre müzeylerinde mevcut.

XS
SM
MD
LG