Rostov-na-Donu şeeriniñ Şimal-Kavkaz arbiy bölge mahkemesi ukrain rejissöri Oleg Sentsov ve Qırım faali Aleksandr Kolçenkoğa üküm çıqardı. Rusiyede olarnı «teraktlarda» qabaatlaylar.
«Bu madde boyunca mahkemeci Sentsovnı 15 yılğa qadar azatlıqtan marum qaldıra. Diger vaqialar (ateşke berüv) – 10 ve 11 sene. «Ealini qorqutmaq» içün patlavlarnı azırlağanı içün – 7 yıl. Patlav maddeleriniñ qanunsız elde etmesi içün – 5 yıl. Silânı qanunsız alda aluv – 5 yıl. Umumen – sert rejimde 20 yıl», – dep haber ete Qırım.Aqiqat mühbiri mahkeme zalından.
Kolçenko içün mahkeme sert rejimli apishanede 10 yıllıq apis cezasını belgiledi.
Böylece, mahkemeci Sentsov ve Kolçenko içün prokuror talap etken 23 ve 13 yıldan 3 ve 2 yılnı «alıp taşladı».
Sentsov ve Kolçenko mahkemeciniñ qarar añlaşıldımı sualine Ukraina gimnini yırlamağa başladılar, soñra da «Yaşasın Ukraina! – Qaramanlar yaşasın!» ayttılar.
Ukrainlerniñ mahkeme ükmü 20 daqqa içinde seslendirildi.
Rusiye akimiyeti Sentsov ve Kolçenkonı Rusiyede yasaq etilgen «Pravıy sektor» ukrain teşkilâtınıñ azaları olaraq ilân etti. Taqiqatqa köre, olar bir sıra Qırım şeerinde terroristik aktlarnı keçirecek ediler, bundan ğayrı, demir yol köpürleri, elektrik yollarını yoq etmek kerek ediler. Ekisi de yaqalanğanından berli qabaatını red ete. Sentsov mahkemede bergen malümatına köre, FSB hadimleri oña basqı yapıp, kerekli malümatlarnı alacaq ediler.
Ukraina prezidenti Petro Poroşenko Twitterde Sentsovğa qoltuttı: «Oleg, dayan. Kün kelir, seni mahkeme etkenler özleri mahkeme etilecek».
Oleg Sentsov – ukrain rejissöri ve faal, 2014 senesi mayıs ayında Qırımda Rusiye mahsus hızmetleri tarafından yaqalandı ve yarımadadan Rusiyege çıqarılıp, anda SİZOda buluna.
Aleksandr Kolçenko da 2014 senesi mayısta Qırımda yaqalanğan edi. Bu iş boyunca Rusiye mahsus hızmetleri Gennadiy Afanasyev ve Aleksey Çirniy de yaqalanğan ediler.
