Kiyevde Rusiye Federatsiyasınıñ elçihanesi yanında avgust 25-te Qırım siyasiy mabusları – rejissör Oleg Sentsov ve Aleksandr Kolçenkoğa qoltutuv aktsiyası başladı. Olarğa bugün Rostov-na-Donu arbiy mahkemesinde ükümni seslendireler.
Qırım.Aqiqat mühbiri bildire ki, elçihane binasına tahminen 150 kişi keldi, olarnıñ arasında kinematograf birliginiñ vekilleri, Kolçenkonıñ dostları, Qırımdan köçip kelgenler, uquq qorçalayıcılar bar.
Aktsiya başında uquq qoruyıcılar beti qapalı olğanlarnı maskalarnı çıqarmağa rica ettiler. Lâkin adamlar işğal etilgen topraqlarnıñ sakinleri olğanını ve olar içün telükeli ola bilecegini aytıp bunı yapmadılar.
İnsanlarnıñ qollarında Sentsov, Kolçenko, em de işniñ diger sımaları – Gennadiy Afanasyev ve Aleksey Çirniyniñ fotosüretlerini ve levhalar bar. Levhalar arasında: «Putin, Oleg Sentsovdan ellerini çek», «Siyasiy mabuslarğa azatlıq» ve il.
Aktsiya iştirakçileri elçihane binasınıñ yanında çıqışta bulunalar.
Oleg Sentsov – ukrain rejissöri ve faal, 2014 senesi mayıs ayında Qırımda Rusiye mahsus hızmetleri tarafından yaqalandı ve yarımadadan Rusiyege çıqarılıp, anda SİZOda buluna. Onı Qırımda teraktlar azırlamasında qabaatlaylar. Qabaat tarafı rejissör içün 23 yıllıq apis cezasını talap ete. Daa bir faal Aleksandr Kolçenkonı prokurorlar 12 yılğa qadar azatlıqtan marum qaldırmağa teklif eteler.
Sentsov ve Kolçenko qabaatlarını red eteler. «Memorial» uquq qorçalayıcı merkezi mahkeme etilgenlerni siyasiy mabus olaraq tanıdı. Ukraina ve Avropala salı künü mahkeme etilgenlerge qoltutuv aktsiyaları keçirile.
